Asiya.az xəbər verir ki, bu barədə APA-nın Rusiya bürosuna Kemerovodakı Azərbaycan icmasının sədri Fikrət Qasımovbildirib. Onun sözlərinə görə, bu gün Azərbaycan icması adından vilayət rəhbərliyinə və yanğında ölənlərin ailələrinə yaxınlarına baş sağlığı verilib: "İlkin məlumatlara görə, yanğında ölənlər və yaralılar arasında həmyerlilərimiz olmayıb".
Qeyd edək ki, dünən Rusiyanın Kemerovo şəhərində yerləşən "Zimnaya vişnya" ticarət-əyləncə mərkəzində ("Qış albalısı") baş vermiş güclü yanğın nəticəsində ölənlərin sayı 64 nəfərə çatıb.
Faciəvi yanğının hadisə şahidləri danışıb. Hadisəni onların dilindən təqdim edirik:
"Yanğın baş verən zaman hamımız içəridə idik. Zalın qapısı açılarkən tüstü qoxusu içəri doldu, artıq koridorda göz-gözü görmürdü. Klub alışıb yanırdı. Nəfəs almaq mümkün deyildi, hamı qışqırırdı. Azyaşlı uşaqlar qorxudan ağlayır, valideynləri isə onları sakitləşdirməyə çalışırdı. Sadəcə dəhşət idi. İnsanlar pəncərələrdən özlərini aşağı atırdı".
Qurbanların bir qisminin fotoları yayımlanıb. Onların əksəriyyəti 5-13 yaşlı azyaşlılardır.
Qeyd edək ki, faciə nəticəsində 50-dən çox insan yaralanıb, 70-ə qədər şəxs isə itkin düşüb.
Şəhərdə 3 günlük matəm elan ediləcək.
