Ərinin “xəyanət”ə görə saçını keçəl etdiyi qadın danışdı: “Qızıma bıçaq verib mənim bədənimə xəsarətlər yetirməsini istəyiblər”

Ərinin “xəyanət”ə görə saçını keçəl etdiyi qadın danışdı: “Qızıma bıçaq verib mənim bədənimə xəsarətlər yetirməsini istəyiblər”
  • Sosial / Manşet

  • İki gündür ölkə gündəmini zəbt edən hadisə ilə bağlı fikirlər səngimək bilmir. Söhbət əri tərəfindən saçı kəsilərək videoya çəkilən qadının görüntülərindən gedir.

    Asiya.az xəbər verir ki, məsələ ilə bağlı araşdırma aparan azxeber.com görüntülərdəki qadının kimliyini müəyyənləşdirib.

    Hazırda Mingəçevir şəhərində yaşayan Günel Mehdiyeva (ad şərtidir) keçmiş həyat yoldaşının atdığı bu addımdan sonra Mingəçevir Şəhər Polis İdarəsinə rəsmi ərizə ilə müraciət etdiyini deyir. Onun sözlərinə görə, hazırda keçmiş həyat yoldaşı və onun qardaşları axtarışdadır.

    Xanımın azxeber.com-a verdiyi özəl müsahibəni təqdim edirik:

    - Görüntülər nə zaman və harada çəkilib?

    - Bu video Rusiyanın Stavrapol şəhərində çəkilib. Görüntülər bu ilin sentyabrın 20-də ayında balaca qaynım tərəfindən çəkilib.

    - Görüntülərdən görünür ki, siz öncə döyülmüsünüz sonra saçınız keçəl qırxılıb. Buna səbəb nə idi?


    - Həmin gün mən evdə idim. Yoldaşım demək olar ki, hər gün içib, evə gəlirdi. Həmin gün də evə içkili gəlmişdi. Sonra mənə təhqir edib, vurmağa başladı. Mən cavab qaytaranda qaynanam mənim saçlarımdan tutaraq otağa götürdü. Başıma çoxlu zərbələr vurmağa başladı. Daha sonra mən huşumu itirdim və məni lüt soyundurub şəkillərimi çəkdilər. Qaynanam həmin zaman saçlarımı kəsdi, ərim Həsənov Elnur isə mənim bədənimə bıçaqla xəsarətlər yetirdi. Üzərimdə siqaret kötüklərinin izi də var. Mən bunlarla bağlı bütün şəkilləri prokurorluğa təqdim etmişəm. Siz o videodan da görürsünüz ki, mən heç bir cavab vermirəm, susuram. Çünki özümdə deyildim, qaynanam dərman vermişdi.

    - Keçmiş əriniz görüntülərdə sizin oğlanla görüşdüyünüzü və ona xəyanət etdiyinizi deyir. Həmin şəxs kimdir?


    - Həmin şəxsi mən görməmişəm. Dediyi şəxs biz evlənmədən öncə mənim qız vaxtından yazışdığım birisi olub. Mən evlənəndən sonra heç kimlə əlaqəm olmayıb. Şəkildəki şəxs isə mənim xalamoğludur. Onlar sadəcə bunlardan istifadə edib məni pis çıxarmaq istəyirlər.

    - Uşağınız indi haradadır?

    - Qaynım uşağımı bizdən qaçıraraq Rusiyaya aparıb. Orada atasının yanındadır. Mən neçə aydır ki, uşağımı görmürəm. Artıq ərim də qayınlarım da axtarışdadır. Polis artıq onların evində axtarış aparacaq.

    - Ərinizlə münasibətləriniz hər zaman belə pis olub?

    - Mən 1994-cü il təvəllüdəm. 2013-cü ildə 19 yaşımda ərə verilmişəm. Elə o vaxtdan bu adamın zülmünü çəkirəm. Mən onun ikinci ailəsiyəm. Məndən öncəki ailəsindən 12 yaşlı bir oğlu var. İndi o xanım da mənə bu məsələdə dəstək olur və biz bir yerdə mübarizə aparırıq. Qaldı ki, münasibətimizə. Bəli, hər zaman pis olub. O həmişə gəzib, məni aldadıb. Heç bir zaman məni ailəsi olaraq görməyib. Mən ondan ayırılıb Mingəçevirə qayıtdım. Daha sonra anası və özü gələrək məndən üzr istədilər, geri çağırdılar. Getdim. Getməz olardım. Başıma bu işləri açdılar.

    - Qızınızla münasibətiniz necədir?

    - Qızım azyaşlıdır. Ona mənim haqqımda olmazın yalanlar danışırlar. Qızımı mənə qarşı nifrətlə doldururlar. Hətda mən prokurorluğa şəkillər də göstərmişəm. Qızıma bıçaq verib mənim bədənimə xəsarətlər yetirməsini istəyiblər. Bundan sonra sadəcə uşağımı onların əlindən geri almaq istəyirəm.

    Azərbaycan Daxili İşlər Nazirliyi (DİN) qadının başının qırxılması ilə bağlı məsələyə münasibət bildirib.

    Nazirliyin Mətbuat xidmətinin rəis müavini Orxan Mansurzadə "Report"a bildirib ki, kütləvi informasiya vasitələrində, sosial şəbəkələrdə əri tərəfindən başı qırxılan gənc qadınla bağlı məlum video yayıldıqdan sonra araşdırma aparılaraq onların şəxsiyyəti müəyyən olunub.

    Qadının anası, Mingəçevir şəhər sakini olan X.Malışova dekabrın 1-də Şəhər Polis Şöbəsinə ərizə ilə müraciət edərək onun ailəsinin və qızının şərəf və ləyaqətinin alçaldıldığını, şəxsi həyatının toxunulmazlığının pozulduğunu bildirib, bu məsələdə günahkar şəxslərin cəzalandırılmasını xahiş edib. Araşdırmalarla müəyyən edilib ki, Gəncə şəhərində anadan olmuş, hazırda Rusiya Federasiyasının vətəndaşı olan E.Həsənov ilə 2013-cü ilin aprel ayında ailə həyatı quran qadın il yarım müddətində həyat yoldaşı və sonuncunun ailə üzvləri ilə birlikdə Rusiyanın Stavropol vilayətinin Kislovodsk şəhərində yaşayıb.

    Lakin 2015-ci ilin oktyabrında həyat yoldaşı ilə münasibətlərində problem yarandığına görə o, anasının yanına qayıdaraq 4 yaşlı övladı ilə birlikdə yaşamağa başlayıb. Bu ilin sentyabrında ərinin valideynləri - qaynanası və qaynatası gəlinlərini yenidən Rusiya Federasiyasına aparsalar da, həmin ayın sonlarında həyat yoldaşının şübhələri və qısqanclığı səbəbindən yenidən narazılıq yaranıb və E.Həsənov Kislovodsk şəhərindəki yaşadıqları ünvanda anasının və böyük qardaşının köməkliyi ilə qadının saçını qırxaraq bunu videoçəkilişlə qeydə alıb.

    Hazırda Mingəçevir Şəhər Polis Şöbəsində məsələ ilə bağlı araşdırma aparılır və nəticəsindən asılı olaraq məsələyə hüquqi qiymət veriləcək


    PAYLAŞ:

    Oxşar xəbərlər