Adil Əliyev: “Avtomobildən istifadə etmək nə vaxtdan qanunsuzluq olub?” - Kolleksiya iddialarına cavab

Adil Əliyev: “Avtomobildən istifadə etmək nə vaxtdan qanunsuzluq olub?” - Kolleksiya iddialarına cavab
  • Araşdırma, Cəmiyyət

  • Oğlu Əli Əliyevin maşın kolleksiyası ilə gündəmə gələn Milli Məclisin vitse-spikeri Adil Əliyev xaricdə yaşayan bloger Həbib Müntəzirin iddiasına cavab verib.

    Asiya.az
    xəbər verir ki, Almaniyada yaşayan Həbib Müntəzirə yazdığı cavabı deputat özü təqdim edib.

    "Mənə qarşı küləyin hansı istiqamətdən əsdiyinə özünüz qərar verin. Həbib Müntəzir, əvvəla, avtomobildən istifadə etmək nə vaxtdan qanunsuzluq olub?

    O ki qaldı nömrəyə, bəli, nömrə mövcuddur. Ancaq avtomobil kolleksiyası mövcud deyil. Mən çox heyfslənirəm ki, kütlə psixologiyası ilə idarə olunan bəzi həmyerlilərimiz var. Təsəvvür eləyə bilmirəm ki, bir nömrəni necə bir neçə avtomobilə vurmaq olar? Bir az ağıllı düşünmək lazımdır.

    Başınız ilə fikirləşsəydiniz, başa düşərdiniz ki, nömrə əvvəl bir avtomobildə olub, sonra o avtomobil satılıb, başqa avtomobil alınıb və nömrə də üstünə vurulub.

    Cəmi iki köhnə avtomobil. Bu qədər bəsit... Bu gün Azərbaycanda kiçik bizneslə məşğul olan insanların da BMW-si var. Küçələr doludu köhnə işlənmiş avtomobillərlə. Hamısı da kreditə verilir, buyurun, ağlınız və imkanınız varsa, siz də alıb sürə bilərsiniz. Heç olmasa, məlumatı verən adamlardan soruşardınız. Hə, əgər bu avtomobillər dövlətdən və xalqdan oğurlanan pullarla alınıbsa, onda mən sizinlə razıyam. Yazmağa və işıqlandırmağa haqqınız var. Əks-təqdirdə belə yalan məlumatlarla camaata özünü ağıllı göstərirsənsə, böyük səhv edirsən.

    Mən və ailəm heç vaxt büdcə təşkilatında işləməmişəm ki, əlimdən hər hansı maliyyə keçsin, mən də əliəyrilik edim. Bu günə qədər maliyyə ilə bağlı hər hansı tenderdə, alqı-satqıda, təmir tikintidə iştirak etməmişik. Ona görə də bu yazını sifariş verənlər öz çirkin əməllərini ört-basdır etməkdən ötrü sizlərin vasitənizlə həyata keçirirlər. Sizlər də bu yalanların alətinə çevrilirsiniz.

    Mən öz əməllərimə görə hər yerdə və hər zaman cavab verməyə hazıram. Ancaq sizlərin yalan üzərində qurduğunuz oyunlar cinayətdən başqa bir şey deyil. Bir də burada kütlə təfəkkürü ilə yaşayanlara demək istəyirəm ki, yazdığınız şər və böhtana görə mütləq Allah qarşısında cavab verəcəksiniz. Bir tək Allah şahidimdir ki, mən çox rahatam, çünki sizdən yox, Allahdan qorxuram".

    Xatırladaq ki, H.Müntəzir A.Əliyevin 23 yaşlı oğlu Ə.Əliyev 99-HA-999 dövlət nömrə nişanlı bir neçə maşına sahib olduğunu yazmışdı. “Bildiklərim bunlardır: “BMW X5 M”, “Porsche Panamera GTS” və “Jiquli VAZ-2107” (avtoşluq üçün). Dövlət nişanlı 10-KO-555 nömrə ilə isə “Cadillac Escalade” sürür. Bəzən nömrəni “BMW X5 M” ilə dəyişərək də qanunsuz olaraq istifadə edir”.
    PAYLAŞ:

    Oxşar xəbərlər