Qənirə Paşayeva şəhid Eltac Əlizadədən yazdı

Qənirə Paşayeva şəhid Eltac Əlizadədən yazdı
  • Hərb

  • Milli Məclisin Mədəniyyət Komitəsinin sədri Qənirə Paşayeva “Vətən uğrunda şəhid olmaq arzularımın ən böyüyüdür deyən qəhrəman şəhidimiz Eltac Əlizadədən yazdı.

    Şəhid Eltac İsmayil oğlu Əlizadə -
    15 oktyabr 1996-cı ildə Tovuzun Catax kəndində doğulub. Şəhid Xəlil Cəfərov adına Çatax kənd tam orta məktəbində oxuyub. Ali təhsilini Azərbaycan Memarlıq və İnşaat Universitetində (AzMİU) alıb. Universiteti bitirdikdən sonra Silahlı Qüvvələrdə həqiqi hərbi xidmətə çağırılıb, 1 illik xidmətini ləyaqətlə başa vurub.

    Sonra yenidən mülki həyata qayıdan Eltac, “Kristal Abseron” tikinti şirkətində mühafizəçi kimi əmək fəaliyyətinə başlayıb. 2020-ci ilin iyulunda Azərbaycan-Ermənistan dövlət sərhəddinin Tovuz istiqamətində Ermənistan silahlı qüvvələrinin hücum cəhdi, hərbi təxribatı baş verdikdən sonra, Səfərbərlik və Hərbi xidmətə Çağırış idarəsinə gedərək, könüllü olaraq döyüşmək istəyini bildirib. Nəhayət sentyabrda istəyi yerinə yetən Eltac, Azərbaycan Böyük Vətən Müharibəsinin ilk günündən döyüşlərdə olub, əks hücum əməliyyatlarında fəal iştirak edib.

    Şücaətli döyüşçü Eltac ailənin tək oğlu idi, buna baxmayaraq, “Vətən uğrunda şəhid olmaq arzularımın ən böyüyüdür!” deyirmiş. Öncəbhədən bacıları ilə telefonla danışan zaman “Mən Şəhid olsam, ağlamayın, başınızı dik tutun! Siz şəhid bacısı olacaqsınız!” söyləyib...

    Sərrast pulemyotçu Eltac, cəbhənin müxtəlif istiqamətlərində düşmənə ağır zərbələr endirib. Döyüş yoldaşları Eltacın açdığı atəşlə yerə sərilən neçə düşmən saydıqlarını deyib. Füzuli, Qubadlı istiqamətində gedən döyüşlərdə qəhrəmancasına döyüşən Eltac, 27 oktyabr 2020-ci ildə şəhadət şərbəti içib.

    Qürurla deyə bilərik ki şəhid Eltac Əlizadə torpaqlarımızı öz qanı ilə yuyan mərd oğullarımızdan biri idi. Və adı kimi elin tacı oldu! Şəhidlərin ruhu kimi ailəsi də əzizdir, baş tacımızdır.
    Şəhidlər ölməz!
    VƏTƏN SAĞ OLSUN!
    PAYLAŞ:

    Oxşar xəbərlər