ADAU-da Musa Bayramov KABUSU

ADAU-da Musa Bayramov KABUSU
  • Araşdırma / Cəmiyyət

  • "2020-ci ilin sentyabr ayında ali təhsil müəssisələrinin rəhbərlərinə müxtəlif vəzifələrə professor-müəllim, kafedra müdiri, dekan və s. seçkilərin keçirilməsi ilə bağlı olaraq Azərbaycan Respublikası Təhsil Nazirinin müavini Firudin Qurbanovun imzaladığı 23.09. 2020-ci il tarixli, 03-11-1022 / 1 saylı rəsmi məktub göndərilmişdir. Həmin məktubda deyilir: "Xüsusi karantin rejimi dövründə namizədlərdən sənədlərin qəbulu,gizli səsvermənin aparılması və digər prosedurların təşkili zamanı bir sıra cətinliklər yaranır. Bununla əlaqədar bildiririk ki, ölkəmizdəki sanitar-epidemioloji vəziyyəti nəzərə alaraq bu tipli seckilərin keçirilməsi xüsusi karantin rejimi başa çatana kimi təxirə salinır""

    Bu sözlər ADAU-nun "Aqronomluq" fakültəsinin professor-müəllim heyəti adından Asiya.az-a göndərilən müraciətdə deyilir.

    Müraciətdə daha sonra bildirilir: "Lakin Azərbaycan Dövlət Aqrar Universitetində Təhsil Nazirliyinin bu məktubu qulaq ardına vurulur. Belə ki,Azərbaycan Dövlət Aqrar Universitetində hal-hazırda “Aqronomluq” fakültəsinə dekan seçkisi keçirilir. Fakültə dekanı seçilmək üçün “Aqronomluq” fakültəsinin sabiq dekanı, dosent İsmayılov Məhərrəm Musa oğlu, Gəncə Dövlət Universitetinin Elmi katibi, dosent İsmayılov Teymur İsmayıl oğlu, GDU-nun sabiq kafedra müdiri, saxta diplom satışına görə həbs olunan və həbsdən yenicə çıxan Rəhimov Vaqif İnqilab oğlu, ADAU-nun “Bağçılıq” kafedrasının müdiri, dosent İdrisov Hüseyn Əkbər oğlu, ADAU-nun “Ekologiya” kafedrasının müdiri, dosent Bayramov Musa Əhməd oğlu öz sənədlərini təqdim etmişdir.

    Musa Bayramov kimdir? Musa Bayramov rektorun yaxın adamlarından biridir. Bu yaxınlarda təzəcə kafedra müdiri təyin olunub. Onun kafedra müdiri təyin olunması rektorun hər dediyinə əməl etməsi, hətta müxtəlif maddi maxinasiyalara qol çəkməsi ilə bağlıdır. Musa Bayramovun rektorun “sirr daşıyıcısı” olması təbii ki, sonuncunu ona yenidən vəzifə verəcək həddə qorxudandır. Musa Bayramov illər əvvəl rus alimlərinin iki dərsliyini plagiat yolu ilə birləşdirib və mənimsəyib, əvəzində elmi rəzalət yaradaraq “oğurladığı” məhsulu “Kənd Təsərrüfatı ekologiyasından praktikum” adlı dərs vəsaitinə çevirib. İllər əvvəl isə bu əməlinə görə kafedra müdirliyindən qovulub. Və onun həmin kafedra müdirliyinə ilk seçkisində elmi adı və elmi dərəcəsi də olmayıb, sadəcə baş müəllim olub. Musa Bayramovun kitab saxtakarlığı Ali Attestasiya Komissiyasına (AAK) da məlum olub, lakin 14.04.2016-cı il tarixdə məhz rektor İbrahim Cəfərovun qrif verilməsi barədə 209 saylı əmri ləğv edilməyib. Ümid edirik ki, yeni təhsil naziri və AAK belə məsələlərə ciddi yanaşacaq, müvafiq komissiyanın fəaliyyətinə göz gəzdirməklə ADAU-dakı saxta elmi ad və dərəcələri ləğv edəcək. Bu kimi plagiat cızmaqaraların isə tezliklə universitetin kitabxanasından çıxarılmaqla çapına və yayılmasına rəsmi qadağalar qoyulacaq.

    Musa Bayramovun adı Müəllimlər İnstitutuna saxta tələbə qəbulunda, saxta diplom satışında, habelə müxtəlif valideynləri aldadıb,onlardan pul alaraq guya onların övladlarını müxtəlif ali məktəblərə qəbul etdirəcəkləri ilə bağlı yalandan vədlər verməkdə hallanır. Əgər bu şagirdlər ali məktəbə öz bacarıqları ilə qəbul olursa, onda onların bu nailiyyətini Musa Bayramov öz adına çıxır, DİM-də tapşırdığını iddia edir. Əks halda isə valideynlərə, narahat olmayın, bir az gözləyin, həll ediləcək deyir, diplomunu verdirəcəm deyir. Qısa desək DİM-in nüfuzuna ləkə gətirməklə məşğul olur.

    ADAU-da saxta elmi adların paylanmasından tutmuş adları müəllim gedib özləri nə auditoriya, nə də tələbə tanımayan iri məmurlara hansı saxta yollarla və necə maaş yazılmasını, onlara yazılan pulları da özlərinin, yoxsa kimin almasını aydın etməyə, aşkar maliyyə pozuntularına görə ölkənin baş prokurorluq və Dövlət Təhlükəsizlik Xidmətinin (DTX) “qara maskalıları”nın təcili olaraq hərəkətə keçməsinə real əsaslar var. Təsəvvür edin ki, rektor şəxsi iradə və maraqları ilə Gəncəbasarın bir çox yüksək vəzifəli şəxslərini ADAU-da “müəllim”

    adı altında birləşdirərək onlara yarımştat dərs yükü bölüşdürülməklə aşkar qanunsuzluqlara, maliyyə pozuntularına da rəvac verib.

    “Ekologiya” kafedrasında iki mötəbər məmurun guya davamlı dərs tədris etməsi, mühazirələr söyləməsi adı altında sənədləşdirmələr aparılıb və dərs jurnalları illərlə saxtalaşdırılıb. Məsələn, hazırda “Gəncə Det-Al Alüminium” Kompleksinin direktoru vəzifəsini daşıyan Cəmil Səfərova adıkeçən kafedrada əsassız maaş yazanlar 7 ildir ki, jurnallarda onun əvəzindən imzalar belə çəkiblər. Aşkar saxtakarlığı isə kafedra müdiri, eləcə də bu günlərdə İbrahim Cəfərov tərəfindən dekan təyin ediləcək plagiat dosent Musa Bayramov həyata keçirib. Sənədlər özü deyir ki, Musa Bayramov uzun müddət rektorun tapşırığı ilə Cəmil Səfərovun əvəzinə jurnallara imza atıb. Dövlət məmurunun “müəllimliyi” müqabilində mövcud maaş kartının isə kimdə olması, təxminən 500 manatlıq maaşı aybaay kimin aldığı qaranlıq qalır. Bundan başqa həmin kafedranın “qiyabiçi” müəllimi, hazırda Şəmkir Regional Meşə Təsərrüfatı idarəsinin direktoru İqbal Əliyev üçün də eyni saxta metod müəyyən edilib. Mühazirələri mövcud olmayan bu dövlət məmuruna da illərdir maaş yazılıb və jurnallardakı imzasını Musa Bayramov atıb. “Dərsə gəlməyən müəllimlər” siyahısında rektor İbrahim Cəfərovla kirvəliyi olan, Gəncə şəhər Nizami rayon Bələdiyyəsinin sədri Qoşqar Məmmədov da var. Onun da hansı fənni nə vaxt tədris etdiyinə dair bilgi yoxdur. Amma illərin göyə sovurduğu pulun bu şəxsə niyə verildiyini də rektordan soruşmaq lazımdır. ADAU-da “sosial yardım” alanlar sırasında YAP Gəncə şəhər təşkilatının sədri Naqif Həmzəyev də yer alıb. Tarix kafedrasından 0,5 ştat vahidi maaş alan millət vəkilinin isə mütamadi olaraq rektora sayqı ifadə etməsi, bütün şəhər tədbirlərinə də birlikdə qatılmaları hər şeyi deyir.

    Dekan seçkisində digər namizəd Vaqif Rəhimov isə GDU-da Ekologiya kafedrasında müdir işləyib. Saxta tələbə qəbulları və saxta diplom satışı məsələsi ilə əlaqədar həbs olunmuşdu. Təhsil Nazirliyi Azərbaycan Müəllimlər İnstitutunun Gəncə filialının fəaliyyətinə xitam verdikdən sonra valideynlərin bir neçəsi pullarını ala bilmədiklərinə görə onun xarici markalı maşınını və evini satdıraraq

    pullarını almağa nail olub, amma bir neçə valideyn isə hələ də pulunu ala bilməyib. İndi həbsdən çıxıb və ADAU-da dekan vəzifəsinə seçilmək istəyir. Dəqiq məlumatlara görə dekan vəzifəsinə seçilmək üçün Teymur İsmayılov 10000 manat, Hüseyn İdrisov 15000 manat, Vaqif Rəhimov 15000 manat rektora rüşvət verib. Bundan xəbər tutan Musa Bayramov tədris müəssisəsini auksyon ilə qarışıq salaraq məbləği xeyli artırmış və dekan seçilmək üçün 20000 manat rüşvət vermişdir.

    Amma dekan vəzifəsinə ən layiqli namizəd Məhərrəm İsmayılovdur. Təəssüf ki, rektor bunu istəmir. Rektor hər vasitə ilə Musa Bayramovu dekan seçmək istəyir. Rüşvətxor, bütün elmi əsərləri plagiatdan ibarət olan, vaxtı ilə civə və narkotik vasitələr alveri lə məşğul olan Musa Bayramov isə nəinki dekanlığa, hətta müəllim vəzifəsinə belə layiq deyil.

    Cənab Prezident, ADAU-dakı bu özbaşınalıqların qarşısını almağı ADAU ziyalıları adından Sizdən xahiş edirik.

    Hörmətlə,
    Aqronomluq fakültəsinin professor - müəllim heyəti adından,
    Fariz Ələkbərov, Sahil Quliyev, Nizami Kazımov, Vüsal Məmmədov, Məşədi Hüseynov".

    İddia olunanlarla bağlı bütün maraqlı tərəfləri dinləməyə hazırıq...
    Asiya.az
    PAYLAŞ:

    Oxşar xəbərlər