Qubada hoteldə kanat qırıldı: 1 nəfər öldü, 2 nəfər yaralandı-Yeniləndi

Qubada hoteldə kanat qırıldı: 1 nəfər öldü, 2 nəfər yaralandı-Yeniləndi "Quba Palace Hotel"in ərazisində baş vermiş qəzaya görə hotel heç bir məsuliyyət daşımır.

Bu barədə Qaynarinfo-ya "Quba Palace Hotel"in Marketinq şöbəsinin direktoru Ceyhun Yəhyayev məlumat verib. O, faciənin "Skada" şirkətinin əməkdaşlarının səhvi ucbatından baş verdiyini bildirib:

"Hotel ərazisində kanat yolu var. Bu kanat yolu qısaldılmalı idi. Bununla bağlı biz araşdırma apardıq və məlum oldu ki, Azərbaycanda bu işlə təkcə "Skada" şirkəti məşğul olur. Biz həmin şirkətin əməkdaşlarını hotelə çağırdıq və onlar gəlib analiz apardılar. Görünür analiz apardıqları zaman səhvə yol verdiklərindən bədbəxt hadisə baş verib. Qəzaya görə "Quba Palace Hotel" heç bir məsuliyyət daşımır. Bütün məsuliyyət "Skada" şirkətinin üzərindədir. Onlar trosu qısaldan zaman özləri ilə gətirdikləri trosu quraşdırmışdılar və hadisə də həmin trosun qırılması nəticəsində baş verdi. 1 nəfər ölüb, 1 nəfər isə yaralanıb. Bəzi saytlarda 4 nəfərin yaralandığı qeyd olunub. Bu, yanlış məlumatdır".

Qeyd edək ki, Quba Mərkəzi Rayon Xəstəxanasından Qaynarinfo-ya 1 nəfərin öldüyü, 2 nəfərin yaralandığı bildirilib.

***

Quba rayonunda bədbəxt hadisə baş verib.

Asiya.az APA-ya istinadən xəbər verir ki, Qubadakı hotellərdən birində kanatın qırılması nəticəsində hotelin əməkdaşı, Qubanın Amsar kənd sakini 1992-ci il təvəllüdlü İsayev Rüzgar Mürvət oğlu ölüb.

Quba rayon sakinləri, 1958-ci il təvəllüdlü Həsənov Rafiq Əziz oğlu və 1985-ci il təvəllüdlü Əliməmmədov Ruhid Mehman oğlu xəsarət alaraq Quba Mərkəzi Rayon Xəstəxanasına yerləşdirilib.

Faktla bağlı araşdırma aparılır.

Əldə etdiyimiz məlumata görə hadisə Quba Palase Hotel"də (keçmiş adı "Quba Rixos") baş verib. Xəstəxanadan Qaynarinfo-ya bildirilib ki, yaralılardan birinin vəziyyəti yüngül, digərininki isə orta yüngüldür.

Oxşar xəbərlər