Çıxış edənlər Yasamal rayon prokuroru Rasim Hacıyev, Respublika Klinik xəstəxanasının baş həkimi Telman İbadov, Akademik Zərifə Əliyeva adına liseyin direktoru Mehriban Vəliyeva, Azərbaycan Dövlət Mədəniyyət və İncəsənət Universitetinin rəssamlıq fakültəsinin dekanı Sevil Kərimova, Bakı Dövlət Universitetinin professoru İsmayıl Əliyev vurğuladılar ki, ümummilli lider Heydər Əliyev hər birimizin həyatında dərin iz buraxıb. O, hər şeydən əvvəl uzaqgörən siyasətçi idi. Heydər Əliyev öz siyasəti ilə, ilk növbədə, xalqımızın, cəmiyyətimizin birliyini təmin edib və qoruyub.XX yüzilliyin 60-cı illərinin sonunda Heydər Əliyevin doğma xalqa həsr olunmuş ömür yolunda yeni, daha geniş, çoxşaxəli, qaynar fəaliyyət dövrü başlandı. 1969-cu ildə - Azərbaycan SSR-də həyatın bütün sahələrində dərin tənəzzülün hökmranlıq etdiyi bir şəraitdə Heydər Əliyev ölkənin ali idarəçilik sükanı arxasına keçdi. Bununla, Azərbaycanın tarixində böyük dönüş dövrü başlandı. Tarixi inkişafın sonrakı gedişi sübut etdi ki, bugünkü yeni, müstəqil Azərbaycanı Heydər Əliyev hələ o zaman qurmağa başlamışdı.
Çıxışlardan sonra Yasamal rayon İcra Hakimiyyətinin başçısı Əziz Əzizov Azərbaycan Respublikası Prezidentinin 2019-cu il 27 may tarixli 1205 nömrəli sərəncamı ilə “Azərbaycan Xalq Cümhuriyyətinin yubiley medalı” ilə təltif olunan rayonun bir qrup ziyalısına yubiley medallarını təqdim etdi. Təltif olunanlar Akademik M.Qasımov adına Respublika Klinik xəstəxanasının baş həkimi Telman İbadov, K. Fərəcova adına Pediatriya ETİ-nin direktoru, professor Nəsib Quliyev, Yasamal rayonu 20 nömrəli məktəb-liseyin direktoru, əməkdar müəllim Səadət Veysova və Yasamal rayonu 13 nömrəli tam orta məktəbin direktoru, əməkdar müəllim Yaqut Sadıqova Azərbaycan Respublikasının Prezidenti cənab İlham Əliyevə göstərdikləri yüksək etimada görə dərin minnətdarlıqlarını bildirdilər.Qeyd etdilər ki, Ulu öndər Heydər Əliyev kimi müdrik liderin işlərini ləyaqətlə davam etdirmək böyük bacarıq tələb edir. Prezident İlham Əliyev dahi siyasətçinin və böyük dövlət xadiminin ən layiqli varisidir. Bütün dünyada olduqca intensiv, gərgin, ziddiyyətli və qarışıq proseslərin getdiyi, qlobal trendlərdə qeyri-müəyyənliyin hökm sürdüyü bir mərhələdə müstəqil dövlət quruculuğu kursunu yaradıcı şəkildə inkişaf etdirmək, tarixi xidmətdir. Azərbaycan xalqı öz prezidentinin ətrafında sıx birləşərək daha da böyük uğurlara imza atacaqdır.
Qeyd edək ki, “Azərbaycan Xalq Cümhuriyyətinin 100 illiyi (1918–2018)” yubiley medalının təsis edilməsi ilə bağlı Prezident İlham Əliyev sərəncam imzalayıb. Bu medalla AXC liderlərinin varisləri və Azərbaycan Xalq Cümhuriyyəti irsinin tədqiqində və təbliğində, Azərbaycan Respublikasının dövlət müstəqilliyinin qorunub saxlanılmasında və inkişafında, ölkənin ictimai-siyasi həyatında xüsusi xidmətlərinə görə Azərbaycan Respublikasının vətəndaşları, əcnəbilər və vətəndaşlığı olmayan şəxslər təltif edilirlər.
