ARB TV-nin "Günə doğru” proqramında mövzu ilə bağlı maraqlı süjet yayımlanıb.
Eyyub Hüseynov - AİB-in Sədri: "Əhali çıxarır paltarları qoyurlar küçənin qırağına, gətirib burda ədədlə satırlar. Biznes yaradıblar”.
Adil Qeybulla – Həkim: "Bunlar çox ucuz olduğundan onları alırlar, gətirirlər. Bəzən onlar kiloqramla, çəki ilə satılır xaricdə. Gətirilib burada satılması sərfəli olur”.
Bakının demək olar ki, bütün rayonlarında 2-ci əl paltarların satıldığı mağazalar fəaliyyət göstərir. Bu cür mağazalara tələbat da kifayət qədərdir. Lakin təklif olunan geyilmiş paltarların nə dərəcədə təmiz və gigiyenik olması insanları düşündürən əsas məqamlardan biridir.
Sakin: "Geyilmiş paltardır yuyulub, gətirib satırlar burda”.
İddialara görə, xarici ölkələrdən, əsasən də Avropadan gətirilən bu paltarlar yuyulub təmizlənmədən, heç bir dezinfeksiya tədbiri görülmədən mağazalara təqdim olunur. Alıcılar isə alış-veriş zamanı bu paltarlara əllə toxunur, geyinib üzərlərində yoxlayırlar. Ekspertlərin fikrincə, bu zaman insanlar hətta bizə tanış olmayan infeksiyalara da yoluxa bilərlər.
Adil Qeybulla – Həkim: "Onların bəzilərində bədən üçün zərərli olan maddələr var. Məsələn sintetik liflərdən istehsal olunmuş bəzi kostyumlarda, o cümlədən uşaq kuklalarında. Paltarlarda olan boyaların özləri. Bəzilərinin orqanizmə konsorigen təsiri də ola bilər. Dəriyə iletasion təsiri ola bilər”.
Bakıda artıq öz alıcı kütləsi olan 2-ci əl mağazalarının satıcıları isə geyimdən xəstələnməyin mümkün olmadığını deyir. Amma satıcılar satdıqları geyimin haradan gətirildiyindən, hansı ölkənin istehsalı olduğundan xəbərsizdilər.
Eyyub Hüseynov - AİB-in Sədri: "Mən özüm gözümlə görmüşəm ki, necə küçənin kənarına qoyurlar. Ölü paltarı da ola bilər. Ölkələrin ətraf mühitindən çıxardırlar belə paltarları”.
Necə deyərlər, ucuz ətin şorbası olmur. Bu gün ucuzdur deyə aldığımız geyimlər isə sabah bizə baha başa gələ bilər. Özü də sözün hər mənasında.
