Asiya.az xəbər verir ki, "Regional Hüquqi və İqtisadi Maarifləndirmə" İB-nin (RHİM İB) qərargahında keçirilən tədbirin aparıcısı - Milli Məclisin Mədəniyyət Komitəsinin eksperti Əkbər Qoşalı Zəfər Bayramı ərəfəsində təqdimatı keçirilən "Yarımçıq qalmış ömür" kitabının Azərbaycan Vətən Müharibəsinin şəhidi, hərbi həkim, "Azərbaycan Bayrağı" ordenli gizir Cəmil Səlimovun həyat və döyüş yolundan bəhs etdiyini bildirib.
Şəhidlərin ruhu bir dəqiqəlik sükutla yad edildikdən sonra çıxışlar başlayıb. Kitabın müəllifi Dürdanə Ağayeva, kitabın önsöz müəllifi - RHİM İB sədri Arzu Bağırova nəşrin məğzi, şəhid həkimin ömür yolu haqqında ürək sözlərini bölüşüb.
Milli Məclisin Mədəniyyət Komitəsinin sədri Qənirə Paşayeva Zəfər Günü ərəfəsində Mədəniyyət Komitəsinin xətti ilə keçirilən silsilə tədbirlərdən söz açıb, hərbi həkim, şəhid gizir Cəmil Səlimov və ona həsr olunmuş kitab barədə danışıb:
"Biz Zəfər Günümuzün müəlliflərinə, şəhidlərimizə, onların ailələrinə öz dərin ehtiramımızı bildirir, canını Vətən uğrunda qurban vermiş qəhrəmanlarımızın ruhu qarşında baş əyirik. Müzəffər Silahlı Qüvvələrimiz Ali Baş Komandanımızın mükəmməl rəhbərliyi ilə tarixi ədaləti bərpa etdi. Belə bir əziz bayram, əziz gün ərəfəsində Cəmil Səlimov kimi igid hərbçimizin ailə üzvlərinin iştirakı ilə onun haqqında kitabı təqdim etmək vəfa borcumuzun ifadəsidir. Burada millət vəkillərimiz, qardaş Türkiyəmizin Yunus Əmrə İnstututunun Bakı nümayəndəliyinin rəhbəri, respublikamızın dəyərli QHT rəhbərləri, gənclərimiz iştirak edir. Əlbəttə, pandemiya məhdudiyyətlərinə görə bura daha çox iştirakçı çağırmamışıq, ancaq bilirik ki, kimi cağırsaq, dəvətimizi qəbul edərdi. Cəmil Səlimov öz həyatını şüurlu surətdə hərb sahəsinə - hərbi həkimliyə bağlamışdı; o və onun kimi oğullar Vətən uğrunda, tarixi ədalətin bərpası uğrunda hər şeyə hazır idilər və bunu şəhadət şərbəti içməklə sübut etdilər. Dürdanə xanım özü Xocalı Soyqırımının şahididir, "Erməni zindanında səkkiz gün" kitabının müəllifidir, müharibənin ağrı-acıları ona yaxından tanışdır və o, bu kitabı da ürəyinin səsi ilə yazıb. Bu gün ən böyük təsəllimiz torpaqlarımızın işğaldan azad olunması, o torpaqlarda quruculuq, abadlıq işlərinin aparılmasıdır. Şuşada dalğalanan bayrağımız, tarixi Zəfərimiz bugünləri görməyən oğullarımızın ruhunu şad edən səbəblərdir. Biz də o oğulları unutmayacaq, unutdurmayacaq, onların haqqında yazacaq, yazılan dəyərli əsərləri, xatirələri sevə-sevə oxuyacağıq".
Millət vəkilləri - Məşhur Məmmədov, Prof.Dr. Anar İsgəndərov Azərbaycan tarixindən, Cümhuriyyət dönəmindən, çağdaş tariximizdən və şəhidlərin tarixdəki müstəsna yerindən söz açıblar. Millət vəkilləri Cəmil Səlimov kimi mərd Vətən övladlarının öz həyatları ilə bugünkü və gələcək nəsillərə örnək olduğunu bildirib, "Yarımçıq qalmış ömür" kimi kitabların öyrədici xüsusiyyətini vurğulayıb. Yunus Əmrə İnstututunun Bakı nümayəndəliyinin rəhbəri Səlcuk Karakılıc Türkiyə- Azərbaycan qardaşlığının tarixindən, buğünundən məmnuniyyətlə söz açaraq, 44 günlük müharibənin bu qardaşlığın səviyyəsini bütün dünyaya nümayiş etdirdiyini söyləyib, öz anasının timsalında 90-cı illərdə Anadolu insanının Qarabağda erməni işğalı xəbərlərindən necə sarsıldığını təsirli faktlarla xatırladıb. Millət vəkili Soltan Məmmədovun köməkçisi Elşad Miraləm, Tərxis Olunmuş Hərbçilərin Gəncləri Maarifləndirmə İB sədri, “Hərbi And” qəzetinin qurucu-baş redaktoru Emin Həsənli, “Xocalı Soyqırımını Tanıtma” İB sədri Şamil Sabiroğlu, Azərbaycan Vətən Müharibəsi Veteranlari Birliyinin sədr müavini İslam Səfərov bu il ilk dəfə qeyd etdiyimiz 8 noyabr - Zəfər Gününün tarixi önəmindən, bu günu bizə bəxş edən Vətən oğullarının rəşadətindən, şəhidlər haqqında yazılan əsərlərin tərbiyəvi əhəmiyyətindən danışıblar. E.Həsənli və Ş.Sabiroğlu RHİM İB sədri A.Bağırovaya və təqdim olunan kitabın müəllifi D.Ağayevaya Təşəkkürnamə təqdim edib. Həmçinin RHİM İB adından adikeçən hərbi vətənpərvərlik yönümlü QHT-lərə, şəhidin ailə üzvlərinə, kitabın müəllifinə, Millət vəkillərinə Qarabağ motivli xatirə hədiyyəsi təqdim edilib. Sonda şəhid gizirin ata və anası kitab və tədbir üzərinə öz ürək sözlərini bildiriblər.
