Asiya.az yazıçı-publisist Nurəddin Ədiloğlunun müəllifi olduğu “ŞƏHİDLİK MANİFESTİ” kitabından şəhid əsgər haqqında yazısını təqdim edir.
19 illik ömrün igidlik səlnaməsi
Şanlı ordumuzun Xüsusi Təyinatlı Qüvvələrində kəşfiyyatçı-istehkamçı vəzifəsinin öhtəsindən layiqincə gələn Musa Mustafayev ilk dəfə Tovuz döyüşlərində xarüqələr yaratmışdı. Sonra Vətən müharibəsindəmina sahələrinin aşkar olunması və keçidlərin açılmasında həmişə öndə gedən əsgərlərimizdən biri kimi ad-san qazanıb. Şəhidlik zirvəsininin əbədyyət sakini olan igid əsgərimizin 19 illik ömrünün həyat cizgilərini qısaca qələmə almağı özümüzə börc bildik.
QISA TANITIM: Mustafayev Musa Əlövsət oğlu 23 mart 2001-ci ildə Masallı rayonunun Xoşçobanlı kəndində dünyaya göz açıb. 2007 ci ildə M.Qarayev adına Sığıncaq kənd tam orta məktəbinin birinci sinfinə daxil olub, 2016-cı ildə həmin məktəbin doqquzucu sinifini bitirəndən sonra Cəlilabad rayonununun Göytəpə qəsəbəsində yerləşən texniki liseyinə qəbul olub. 2019-cu ildə təhsilini başa vurub geniş profilli traktorçu-maşinist, çilingər-sürücü ixrtisasına yiyələnib.
2019 - cu ilin iyulunda Səfərbərlik və Hərbi Xidmətə Çağırış üzrə Dövlət Xidmətinin Masallı Rayon şöbəsi tərəfindən hərbi xidmətə çağırılıb.
Azərbaycan Silahlı Qüvvələrinin Cəlilabad şəhərində yerləşən "N" saylı hərbi hissəsində, sərhəd zastavasında müddətli həqiqi hərbi xidmətə başlayıb.
2020-ci ilin iyulundaTovuz döyüşlərində iştirak edib. 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərimizin azad edilməsi üçün başlanan Vətən müharibəsi zamanı Cəbrayılın, Füzulinin və Xocavəndin azadlığı uğrunda gedən döyüşlərdə savaşıb. Füzulinin azadlığı uğrunda gedən əks-hucum əməliyyatında böyük şücaət göstərib, düşmən mövqelərinə sarsıdıcı zərbələr endirib. Oktyabrın 6-da Füzuli döyüşləri zamanı snayper gülləsinə tuş gələrək qəhrəmancasına şəhid olub.
Oktyabr 7-də Xoşçobanlı kənd qəbiristanlığında böyük izdihamla dəfn olunub. Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikasının Prezidentinin Sərəncamlarına əsasən, Musa Mustafayev ölümündən sonra “Azərbaycan Bayrağı” ordeni, "Vətən uğrunda", “Cəsur döyüşçü” və "Füzulinin azad olunmasına görə" medalları ilə təltif edilib.
Arzusu hərbçi olmaq idi
...Musa beş bacının tək qardaşı idi. Atasından sonra evin ikinci kişisi kimi, ailənin qayğı yükünü öz çiyinlərində daşıyan zəhmətkeş övlad olub. Dayısı oğlu Elnur Əmənov deyir ki, Musanı hər hansı bir iş üçün dəfələrlə göndərsəydin, heç vaxt yoruldum, usandım deməzdi. Ailəsi və bütün doğmaları onu həmişə tərbiyəli, gülərüz və mehriban gənc kimi xatırlayırlar.
Musanın uşaq yaşlarından ən böyük arzularından biri əsgər getmək idi. Anası Gülarə xanım deyir ki, biz onun ali təhsil almasını istəyirdik. “Amma uşaq çağından idi. Göytəpədə peşə məktəbini bitirəndən sonra elə hey deyirdi ki, mən əsgər gedəcəyəm, orada müddətən artıq hərbçi kimi qalıb Vətənə xidmət edəcəyəmə” Musabın texnikanı dərindən öyrənməsinin bir səbəbi də hərbi xidmətdə tankçı olmaq istəyindən irəli gəlirdi.
Əmisi Cəbrayıl Ağayev birinci Qarabağ müharibəsində iştirak etmişdi. Deyir: “Musa həmişə məndın xahiş edərdi ki, ona həmin müharibədən, döyüş yoldaşlarım barəsində danışım. Bir dəfə onun bu marağının səbəbini soruşanda cavab verdi ki: “Ola bilsin ki, elə mən də sənin yolunu getdim!..”
Hərbi xidmətə yollanan günü Musa əlində bayraqla rəqs edib. Sonra o, həmin bayrağı ailə üzvlərinə verib, onu göz bəbəyi kimi qorumağı tapşırmışdı. Kim bilərdi ki, bir ildən sonra onun tabutu üçrəngli Azərbaycan bayrağa bükülüb son mənzilə yola salınacaq!..
Muzeyi xatırladan xatirə guşəsi
Xatirə guşəsində diqqətimizi cəlb edən Fəxri fərmanda bu sözlər yazılıb:
“Musa Mustafayev Cəlilabad peşə liseyinin ictimai -siyasi həyatında və təhsildə fərləndiyinə görə Azərbaycan Xalq Cumhuriyyətinin yaranmasının 100 illik yubileyi münasibəyi ilə təltif olunur. Direktor Etibar Sadıqov.”
...Zəhmətkeşliyi, çətinliklərə sinə gərməsi, nəzəri bilikləri, fiziki hazırlığı və praktiki vərdişləri Musanın hərbi xidmətdə Xüsusi Təyinatlı Qoşunlarda xidmət etməsinə gətirib çıxartmışdı. Andiçmə mərasiminsdən sonra Gəncədən Bərdəyə, sonra Göytəpəyə göndərilmişdi. XTQ-də kəşfiyyatçı-istehkamçı ixtisası üzrə xidmətini uğurla davam etdirib. Sorağı gah Murovdan, gah Tovuzdan gəlirdi. Amma Tovuz döyüşlərində iştirakını ailəsindən gizlətmişdi. Qazandığı döyüş təcrübəsi ona və əsgər yoldaşlarına Vətən müharibəsində əks-hücum əməliyyatlarının gedişində kömək olur.
Xatirə guşəsində Musanın lənkaranlı Əli, şamaxılı İlkin adlı silah yoldaşları ilə çəkdirdiyi bir şəkilin altında belə qeyd yazılıb: “Canım qardaşım, biz zamanlar üçümüz də bir idik, indi isə mən tək qaldım. Söz verirəm ki, sizi son nəfəsimə kimi unutmayacağam. Bizim bir sozümüz vardı, bu hərbi formada kişi kimi Vətənə xidmət edək... İndi siz yoxsunuz, amma sizin bu arzunuzu mən yerinə yetirəcəyimə söz verirəm...” Bu fikirlər XTQ-nin əsgəri İlkin Ələkbərova aiddir.
İlkinin verdiyi bu yazılı vədə əməl etməsi başqa bir qeyddə (İlkinin anasının dilinindən yazılan qeyddə) öz təsdiqini belə tapıb: “Can, şirin balamız Musa, İlkinimin can dostu. Rahat uyu. Sənin qisasını almaq üçün İlkin qardaşın onlarla erməni öldürdü. Hər birini də öldürəndə Musa, qardaşım, intiqamını aldım dedi. Körpə bala, istehkamçı - kəşfiyyatçı Xüsusi Təyinatlı Musamız. Hər oğulun işi deyildi ki, sənin kimi ən öndə kəşfiyyatçı kimi döyüşə... Musa, sən bizim ürəyimizdə əbədi qalacaqsan!..”
Xüsusi təyinatlı silahdaşları lənkəranlı Əli Mehdizadənin və Musa Mustafayevin qisasını Suqovuşanda artıqlaması ilə aldılar. Onların qanları yerdə qalmadı. Nur içində yatan cənnətməkan şəhidimizin qoynunda gəzdirdiyi Azərbaycanın üçrəngli bayrağını cəsur silahdaşları Qələbə bayrağı kimi dalğalandırdılar.
Yazımıza ömrünün 19-cu baharında həyatını Vətən uğrunda qurban vermiş qəhrəman Musanın xatirəsinə onun Cəlilabad peşə liseyində birgə təhisil aldığı Qabil adlı əsgər yoldaşı yazdığı şeirlə yekun vururuq:
Nurüzlü şəhid qardaşıma
Mərd doğulmusan sən bu cahana,
Unutmaq olarmı səni, şəhidim.
Sən tək igid oğlun gözləyər ana,
Tapılmaz heç yerdə tayın şəhidim.
Ağlımdan çıxmır ki, sənin nur üzün,
Fəxrlə anıram səni şəhidim.
Anan səni sevib əzizləyirdi,
Yastığın təsəlli olub şəhidim.
Evin hə köşəsi sən tək qoxuyur,
Varlığın hər zaman candır şəhidim.
Məndən soruşsalar Musa kim olub,
Uzun cümlələrlə başa salaram-
Sənin hünərini, sənin adını,
Allah da unutmaz canım, şəhidim.
