Asiya.az xəbər verir ki, açılış mərasimində Azərbaycan Respublikasının Dövlət Himni səsləndirilib, torpaqlarımızın azadlığı və ərazilərimizin bütövlüyü uğrunda canından keçən şəhidlərimizin əziz xatirəsi bir dəqiqəlik sükutla yad olunub. Ev-muzeyinin açılış mərasimində Cəlilabad rayon icra başçısının müavini, iqtisadçı alim Nazim Şükürov çıxış edərək ölkə Prezidenti, Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsinin Ordumuzun şanlı Qələbəsi ilə başa çatdığını, Rəşad Abdullayevin və Vətənimizin azadlığı uğrunda canlarından keçən digər şəhidlərimizin qanının yerdə qalmadığını bildirib. O, haqq savaşında əldə edilən şanlı Qələbəyə görə, Müzəffər Ali Baş Komandana, qüdrətli Azərbaycan Ordusuna, şəhidlərimizə və qazilərimizə borclu olduğumuzu vurğulayıb. Qeyd edib ki, əldə etdiyimiz parlaq Qələbə Azərbaycan tarixinin və dünya hərb tarixinin səhifələrinə qızıl hərflərlə həkk olunub. İcra başçısının müavini dövlətimizin qazi, müharibə iştirakçıları və şəhid ailələrinə hər zaman böyük diqqət və qayğı göstərdiyini, onların yanında olduğunu və sosial problemlərinin həlli istiqamətində zəruri tədbirlər gördüyünü qeyd edib. O, ev-muzeyinin açılışının qəhrəman kapitan Rəşad Abdullayevin doğulduğu günə təsadüf etdiyini diqqətə çatdırıb. Tədbirdə kapitan Rəşad Abdullayevin həyat və döyüş yolundan, göstərdiyi qəhrəmanlıqdan, düşmənə qarşı savaşda şücaətlərindən bəhs edilib. Bildirilib ki, Rəşad Abdullayev Aprel döyüşləri zamanı da "N" saylı hərbi hissənin komandir müavini kimi döyüşlərdə yaxından iştirak edib. O, döyüş başlayandan bitənə qədər mühasirədə olsa belə, mühasirədən çıxmağı bacarıb, Ermənistan Ordusunun zabit-əsgər heyətini məhv edib. Gecə döyüşləri zamanı Cəbrayıl rayonunun Lələtəpə istiqamətində olan əlverişli mövqelər, strateji nöqtələr, o cümlədən Lələtəpə zirvəsi Azərbaycan Ordusu tərəfindən işğaldan azad olunub. Daha sonra çıxış edən şəhid kapitan Rəşad Abdullayevin atası Arif Abdullayev övlad itkisinin çətinliyindən danışıb. Bildirib ki, ağrı və acılarına dövlətin şərik olması, daim yanlarında olaraq qayğı və istəkləri ilə maraqlanması onların özlərini tənha hiss etməmələrinin başlıca səbəblərindəndir. Şəhid atası dövlətimizin başçısı İlham Əliyevin və birinci xanım Mehriban Əliyevanın qayğısını və diqqətini hər zaman hiss etdiklərini söyləyib. Arif Abdullayev, həmçinin oğlunun adının əbədiləşdirilməsi məqsədilə 2021-ci ildə Cəlilabad şəhəri 2 nömrəli tam orta məktəbə Rəşad Abdullayevin adının verildiyini diqqətə çatdırıb. O, ev-muzeyinin təşkilində göstərdikləri dəstəyə görə Cəlilabad rayon İcra Hakimiyyətinin başçısına təşəkkürünü bildirib. Qeyd edək ki, Rəşad Abdullayev 14 sentyabr 1988-ci ildə Cəlilabad rayonunun Göytəpə şəhərində anadan olub. O, 29 sentyabr 2020-ci ildə Kəlbəcərin azad edilməsi əməliyyatında şəhidlik zirvəsinə yüksəlib. Azərbaycan Respublikası Prezidenti İlham Əliyevin 9 dekabr 2020-ci il tarixli Sərəncamı ilə kapitan Rəşad Abdullayevə “Vətən Müharibəsi Qəhrəmanı” adı verilib. Həmçinin ölkə başçısının sərəncamları ilə o, ölümündən sonra "Vətən uğrunda", "Kəlbəcərin azad olunmasına görə" və "Xocavəndin azad olunmasına görə" medalları ilə təltif edilib.
