Asiya.az-ın məlumatına görə, Saatlı sakini 27 yaşlı Fəridə İsayeva danışır ki, 14 yaşından talassemiyadan əziyyət çəkir. Ancaq illərdir ki, əlillik dərəcəsinin təyin olunması üçün müraciət etsə də, əlillik dərəcəsi ala bilmir. Fəridə xanım bunu rüşvət verməməsi ilə əlaqələndirir.
“2 uşağım var, ailə vəziyyətimiz olduqca ağırdır, həyat yoldaşım bir neçə il əvvəl avtomobil qəzası keçirib, kəllə sümüyü 9 yerdən yarılıb, 1-ci qrup əlildir, cəmi 250 manat pensiya alır. Həyat yoldaşımın valideynləri ilə bir evdə qalırıq, onlar da ağır xəstədilər. Yoldaşımın pensiyası həm dolanışığımıza, həm də mənim dərmanlarıma xərclənir, heç çox vaxt öz dərmanlarını ala bilmir. Xəstəxana gah düzgün rəy yazmır, gah sənədi Komissiyaya yarımçıq göndərir, beləcə də vaxt gedir. Özüm xəstə, yoldaşım xəstə, iki azyaşlı uşaq, kasıbçılıq, qayğılar, bütün bunlara görə Bakıya şikayətə gedə bilmirik. Getsək belə, xeyri olmur. Bu yaxınlarda yoldaşım Əmək və Əhalinin Sosial Müdafiəsi Nazirliyinə getdi, ordan da “gedin, xəstəxana sənədləri göndərsin, baxaq”, – deyib, yola saldılar. Xəstəxana da dediyim kimi, sənədləri eyni qaydada – natamam yazıb göndərir. Nazirlik həmin sənədlərə əsaslanıb əlillik dərəcəsi təyin edə bilmir”, – şikayətçi danışır.
Fəridə xanım deyir, adamlar əlillik dərəcəsi təyin edilməsi üçün xəstəxanaya 500, 100 manat rüşvət verib rəy alırlar: “Həkimlər deyir, ayda əlillik dərəcəsi təyin edilməsi üçün rüşvətlə 23-25 adama rəy verilir. Deyirlər, gərək yuxarıdan da tapşırıq ola ki, bu rəylər verilə… Hər ay Bakıya gedirəm, Qanköçürmə İnstitutunda mənə qan köçürülür. Elmi Tədqiqat Hematologiya və Transfuziologiya İnstitutunun epiqrizində də xəstəliyim barədə ətraflı məlumat qeyd olunub. Talassemiya sağalmaz qan xəstəliyidir. Bu xəstəliyə tutulan adama ömrünün sonunadək qan vurulur. Həkimlər deyir, əlillik dərəcəsinin təyin olunması bu xəstəliyin təsiri altına düşür, buna görə mənə 2-ci qrup əlillik təyin olunmalı, xəstəliyə görə ömürlük müavinət verilməlidir. Hazırda bu müavinətin məbləği 130 manatdır. Versələr, dərmanlarımı özüm alaram, yoldaşım da pensiyası ilə öz dərmanlarını alar, hər dəfə dərmanlarına görə pul axtarmaz. Pensiyası mənim dərmanlarıma xərclənir deyə, özü bəzən aylarla dərmanlarını alıb qəbul edə bilmir, vəziyyəti ağırlaşır. Adamın kəlləsində 9 yerdən sınıq var, dərmanlarını vaxtında qəbul etməlidir ki, həyatda qalsın”.
Məsələ ilə bağlı Saatlı rayon Mərkəzi Xəstəxanasından saytımıza ünvanlanan açıqlamanı təqdim edirik:
“Bildiyiniz kimi, əlillik dərəcəsini Azərbaycan Əmək və Sosial Müdafiə Nazirliyinin Tibbi Sosial Ekspertiza komissiyası təyin edir. Yerli səhiyyə müəssisələri deyil. O vətəndaşın sənədləri 05.12.2019, 19.02.2020 və 06.06.2020 ci il tarixlərdə Saatlı Mərkəzi Rayon Xəstəxanasının Həkim Məsləhət Komissiyasından keçirdilərək 088 nömrəli forma yazılaraq TSEK-na onlayn olaraq göndərilmişdir və TSEK tərəfindən imtina verilmişdir. Burada Saatlı RMX nın heç bir günahı yoxdur. Biz Səlahiyyətimiz çərçivəsində nə lazımdırsa etmişik. O ki qaldı düzgün doldurulmamağa Gətirdiyi Epikrizlərdə nə yazılıbsa bizdə həmin məlumatları sistemə yazıb göndəririk.
Həqiqətəndə o xəstəlik o vətəndaşda varsa canlı olaraq gedib Tibbi Sosial Ekspertiza komissiyasına şikayət etsin yerindəcə həkim komissiyası təşkil edib, ona verilən epikrizdəki diaqnoza uyğun müayinə edəcəklər və həqiqətən xəstə olduğu halda TSEK özü vətəndaşa əlillik dərəcəsi verəcək”
