2005-ci il martın 10-da ləğv olunmuş Milli Təhlükəsizlik Nazirliyinin keçirdiyi "Qara kəmər” əməliyyatı nəticəsində mütəşəkkil dəstə üzvləri ilə birlikdə həbs edilən Hacı Məmmədovun sirli intiharından sonra geridə çoxlu sayda açıq qalmış suallar ictimaiyyətin əsas müzakirə mövzusudur.
Bir neçə il öncə İşgəncələrə Qarşı Azərbaycan Komitəsinin sədri mərhum Elçin Behbudovun Hacı Məmmədovun onunla təcili görüşmək istəməsi ilə bağlı mətbuata verdiyi açıqlamalar sosial şəbəkələrdə müzakirə mövzusuna çevrilib.
İki il öncə hüquq müdafiəçisi bildirmişdi ki, Hacı Məmmədov ona görüş zamanı E.Behbudova yağlı boya ilə çəkilmiş 4 fotoşəkil verib. Mərhum E. Behbudov həmin zaman verdiyi məlumatda bu rəsmlərin xüsusi kodlardan ibarət olduğunu və ikinicinin ona bu şəkillər vasitəsi ilə önəmli məlumatlar açıqlamaq istədiyini bildirmişdi:
"Rəsmlərin arxasında onların çəkildiyi tarix qeyd olunub. Orada Hacı Məmmədov həm də onları mənə hədiyyə etdiyini yazıb. Özü mənə deyib ki, onların hər birinin parolu, şifrəsi var. Amma parolu mənə açmır”.
E.Behbudovun sözlərinə görə H.Məmmədov ondan bu rəsmləri mətbuatda yaymağı və rəsmlərə gələcək qiymətlərlə bağlı ona məlumat verməyini istəyib: "Amma mənə elə gəlir ki, vaxt gələcək bu rəsmlərin qiyməti olmayacaq. Ofisimizdə oğurluq olmuşdu. Qorxdum ki, birdən Hacının şəkilləri də oğurlanar. Amma xoşbəxtlikdən oğrular bu rəsmlərin qiymətini başa düşməyib”.
2015-ci ilin 14 noyabr tarixində Elçin Behbudov əziyyət çəkdiyi şəkərli diabet xəstəliyindən vəfat edib.
H.Məmmədovun ötən gün özünü asaraq öldürməsi isə bu rəsmlərin yenidən gündəmə gəlməsinə səbəb olub. Həmin rəsmləri təqdim edirik: (azxeber.com)
Rəsm 1. Zəncirdə olan şir. Şirin zənciri bir qadının əlindədir. Ətrafda 5 ağ göyərçin uçuşur.
Rəsm 2. Əlində silah olan cavan oğlan. Arxada məşhur "Biq Ben” saatı, "Jeep” maşını və yerə sərilmiş kişi meyiti. Oğlanın üzündə təbəssüm var. Əlinin şəhadət və orta barmağını yuxarı tutmaqla ya latınca "viktoriya” (qələbə) anlamını verən "V” işarəsini, ya da 2 rəqəmini göstərir.
Rəsm 3. Böyük bir daşa söykənmiş bir qadın. Saçlarının rəngindən rus olduğu görünür. Qadının söykəndiyi daşın üstündə İsa Peyğəmbərin şəkli həkk olunub. Arxa fonda çəmənlikdə ağ at, başqa ölkəyə köç edən 3 durna, atın yanında isə kişi silueti, kölgə.
Rəsm 4. Başında şlyapa olan orta yaşlı kişi, arxada ağaclar və yenə də "202 nömrəli "Jeep” və yerdə kişi meyiti.
