Asiya.az xəbər verir ki, məktəbin müdiri Aygün Həsənoğlu Rəsmiyyə Sabirin həyat və yaradıcılığı haqqında məlumat verib, şair və alimin çoxşaxəli fəaliyyətinin və şəxsiyyətin örnək olduğunu qeyd edib.
Professor Rəsmiyyə Sabir Azərbaycandan şair və yazıçılarının, alimlərimizin, hazırda İstanbulda Beynəlxalq Dərgilər Sərgisində təmsil etdiyi "Ulduz" jurnalı kollektivinin salamlarını çatdıraraq uşaqlara elm və təhsilin əhəmiyyətindən danışıb, uşaqlara yaxşı oxumağı, vətənlərinə layiq övlad olmağı tövsiyyə edib.
Tədbirdə uşaqlar Rəsmiyyə Sabirin şeirləri ilə bərabər, digər şairlərin şeirlərini söyləyib, mahnılar oxuyublar. Məktəbin ən istedadlı şairlərindən olan 7-ci sinif şagirdi Fariz Nəsirov özünün 44 günlük müharibə dövründə yazdığı "Azərbaycan əsgəri" və "Şuşa" şeirlərini söyləyib. Jurnalist Yaqut Misirxanlı böyük şairimiz Sabir Rüstəmxanlının "Vətən" şeirini ifa edin.
Tədbirdə Rəsmiyyə Sabir uşaqların suallarına cavab verib, məktəbin və dərnəyin Azərbaycan kitabxanası"na öz kitabları ilə birlikdə Azərbaycan uşaq ədəbiyyatı nümunələrini və nağıl kitabları hədiyyə etmişdir.
Rəsmiyyə Sabir uşaqların xahişi ilə onların dəftərlərinə imzasını atıb. Uşaqlar şeir məclisindən və görüşdən çox məmnun qalaraq Rəsmiyyə xanıma təşəkkürlərini bildiriblər.
